Gerður Þóra Björnsdóttir hagfræðingur gerði kostnaðarábatagreiningu á Reykjavíkurmaraþoni Íslandsbanka 2010 sem lokaverkefni í hagfræði við Háskóla Íslands í vetur. Niðurstöður rannsóknarinnar sýna að það er þjóðhagslega hagkvæmt að halda Reykjavíkurmaraþon Íslandsbanka og nemur ábatinn um 174 milljónum á ári.

Hlaupið hefur skilað miklum ábata í heilsu þátttakenda sem að sjálfsögðu er þjóðhagslegur ábati. Rannsóknin sýndi fram á að ábati í heilsu vegna Reykjavíkurmaraþons Íslandsbanka 2010 dreifðist á tvö ár, 2010 og 2011. Nam hann tæpum 17 milljónum árið 2010 og 6,4 milljónum árið 2011. Þessar niðurstöður koma ekki á óvart þar sem að bæði rannsókn og könnun sem gerðar voru á meðal þátttakenda Reykjavíkurmaraþons Íslandsbanka árið 2007 og 2010 hafa sýnt fram á aukna hlaupaþjálfun þátttakenda. Bæði rannsóknin og könnunin sýndu að ákvörðun meirihluta þátttakenda um að taka þátt í hlaupinu hafði mikil jákvæð áhrif á hlaupaþjálfun þeirra fyrir hlaupið. Einnig sagði stór hluti hlaupara að þátttakan í hlaupinu hefði leitt til þess að þeir juku hlaupaþjálfun sína eftir hlaupið.

Það eru þó tekjur af erlendum ferðamönnum sem skila mestum fjárhagslegum ábata til þjóðfélagsins en þeim hefur einmitt fjölgað töluvert milli ára í 28 ára sögu hlaupsins. Árið 2010 voru erlendir þátttakendur 1.028 og árið 2011 1.396 og höfðu þá aldrei verið fleiri. Í ár fer Reykjavíkurmaraþon Íslandsbanka fram í 29. sinn og hafa nú þegar 739 erlendir hlauparar skráð sig til þátttöku í hlaupinu en þeir voru 522 á sama tíma í fyrra.

Þetta eru vissulega frábærar niðurstöður og sýna að íþróttaviðburðir eins og Reykjavíkurmaraþon séu hvatning fyrir fólk til að hreyfa sig og breyta um lífsstíl auk þess að vera fjárhagslega hagkvæmir fyrir þjóðarbúið.

Í frétt í Morgunblaðinu þann 19.maí síðastliðinn er því slegið fram að talsvert hafi borið á óánægjuröddum þeirra sem þykir skráningargjöld í Reykjavíkurmaraþon Íslandsbanka heldur há. Reykjavíkurmaraþon kannast ekki við þessar óánægjuraddir enda er verðinu í hlaupið stillt í hóf og aðeins um vísitöluprósentu hækkanir að ræða milli ára.

Reykjavíkurmaraþon gerði könnun eftir Reykjavíkurmaraþon Íslandsbanka 2010 á viðhorfi hlaupara til ýmissa þátta sem tengjast hlaupinu. Í könnuninni kom meðal annars fram að meirihluta þátttakenda þótti verðlagning hlaupsins vera sanngjörn og aðeins 12% fannst hún það ekki.

Ef skoðuð eru þátttökugjöld í önnur hlaup á Norðurlöndunum kemur í ljós að það er mjög ódýrt að hlaupa á Íslandi. Í Reykjavíkurmaraþoni Íslandsbanka 2012 kostar á bilinu 5.300-11.000 kr að taka þátt í maraþoni, allt eftir því hvenær hlauparar skrá sig til þátttöku. Í Kaupmannahöfn er verðið fyrir heilt maraþon 13.100-14.200 kr, í Helsinki 9.000-14.000 kr og í Osló 15.300 kr. Hálfmaraþon kostar á bilinu 4.200 til 8.300 kr í Reykjavíkurmaraþoni Íslandsbanka. Til viðmiðunar er gjaldið í hálft maraþon í Gautaborg 8.900-12.400 kr, í Stokkhólmi 8.500-9.100 kr og í Osló 13.200 kr. Þá kostar 10 km hlaup í Osló 10.000 kr en í Reykjavík á bilinu 3.400-6.600 kr. Í Reykjavík er meðal annars innifalið í þátttökugjaldinu bolur, drykkir, verðlaunapeningur og pastaveisla. Á hinum Norðurlöndunum þarf stundum að greiða sérstaklega fyrir þessa þætti.

Að lokum má nefna að þátttökugjöld barna og unglinga 16 ára og yngri í Reykjavíkurmaraþon Íslandsbanka voru lækkuð á milli ára. Í hlaupinu 2012 verður því ódýrar fyrir börn heldur en árið 2011 en fyrir aðra aldurshópa er örlítil hækkun milli ára sem helst í hendur við vísitölu. Sjá nánari verðskrá hlaupsins hér.