• Reykjavíkurmaraþon Íslandsbanka

    Reykjavíkurmaraþon Íslandsbanka 2018 fer fram laugardaginn 18.ágúst. Búast má við að um 15 þúsund manns taki þátt í hlaupinu en hægt er að velja fimm mismunandi vegalengdir. Smelltu hér til að skoða nánari upplýsingar.
  • Víðavangshlaup ÍR

    Á sumardaginn fyrsta, 19.apríl 2018, fer Víðavangshlaup ÍR fram í 103.sinn. Boðið er uppá 5 km hlaup og 2,7 km skemmtiskokk í miðbæ Reykjavíkur. Smelltu hér til að skoða nánari upplýsingar.
  • Fjölnishlaup Gaman Ferða

    Þann 10.maí 2018 fer Fjölnishlaupið fram í 29.sinn í Grafarvoginum. Hlaupin er skemmtileg 10 km leið um Grafarvog en einnig er hægt að velja 5 km og 1,4 km skemmtiskokk. Smelltu hér til að skoða nánari upplýsingar.

  • Miðnæturhlaup Suzuki

    Miðnæturhlaup Suzuki fer fram fimmtudagskvöldið 21.júní 2018 á Sumarsólstöðum. Hlaupið hefst og endar í Laugardalnum og að loknu hlaupi er öllum þátttakendum boðið í Laugardalslaugina. Smelltu hér til að skoða nánari upplýsingar. 

  • Ármannshlaup Eimskips

    Að kvöldi 4.júlí fer Ármannshlaup Eimskips 2018 fram. Hlaupið er frá Sundagörðum að Hörpu og til baka á flatri og hraðri braut sem hentar vel til bætinga. Smelltu hér til að skoða nánari upplýsingar. 

Andrea og Arnar sigruðu í Fjölnishlaupi Gaman Ferða

Fjölnishlaup Gaman Ferða, annað hlaupið af fimm á mótaröðinni Powerade Sumarhlaupin 2018, fór fram í mildu og góðu hlaupaveðri á Uppstigningardag. Þetta var í 30.sinn sem hlaupið fór fram og var metþátttaka, 280 keppendur. Hægt var að velja um 10 km hlaup, 5 km hlaup og 1,4 km skemmtiskokk en 10 km hlaupið gaf stig í stigakeppni Powerade Sumarhlaupanna og var jafnframt Íslandsmeistaramót í 10 km hlaupi. Sigurvegarar í 10 km hlaupinu voru þau Andrea Kolbeinsdóttir og Arnar Pétursson.

Andrea Kolbeinsdóttir úr ÍR sigraði 10 km hlaup kvenna og Íslandsmeistaratitilin í 10 km hlaupi kvenna á tímanum 37:29. Í öðru sæti var Elín Edda Sigurðardóttir, einnig úr ÍR, á tímanum 37:59. Helga Guðný Elíasdóttir úr Fjölni varð í þriðja sæti á 39:22 en tíminn er persónulegt met hjá henni, bæting um 24 sekúndur.

fjolnishlaup-kvk-2018
Frá vinstri: Elín Edda, Andrea, Helga Guðný.

Arnar Pétusson úr ÍR sigraði í 10 km hlaupi karla og Íslandsmeistaratitilinn í 10 km hlaupi karla á tímanum 32:46. Í öðru sæti var Fjölnismaðurinn Ingvar Hjartarson á 32:59 og í því þriðja Þórólfur Ingi Þórsson úr ÍR á 33:28.

fjolnishlaup-kk-2018
Frá vinstri: Ingvar, Arnar, Þórólfur.

Úrslit í öllum vegalengdum og aldursflokkum Fjölnishlaups Gaman Ferða má finna á timataka.net.

30 ára afmælishlaup í Grafarvoginum

Framundan er Fjölnishlaup Gaman Ferða, annað hlaupið af fimm á dagskrá Powerade Sumarhlaupanna 2018. Hlaupið verður ræst í 30.sinn fimmtudaginn 10.maí kl.11:00 frá Íþróttamiðstöðinni í Dalhúsum í Grafarvogi. Í Fjölnishlaupi Gaman Ferða er boðið upp á vegalengdir fyrir bæði byrjendur og vana hlaupara: 10 km hlaup, sem jafnframt er Íslandsmeistaramót í 10 km hlaupi, 5 km hlaup og 1,4 km skemmtiskokk.

Forskráning í 10 km og 5 km hlaupin fer fram á hlaup.is og er opin til miðnættis miðvikudaginn 9.maí. Allir eru hvattir til að forskrá sig í þessar vegalengdir því þátttökugjald er lægra í forskráningu en á staðnum. Skráning í skemmtiskokk fer fram á staðnum og er aðeins 1.000 kr á mann en hver fjölskylda greiðir að hámarki 3.000 kr (4 og fleiri). Afhending gagna og skráning á staðnum verður kl.9:00-10:30 í anddyri Grafarvogslaugar í Íþróttamiðstöðinni í Dalhúsum.

Að hlaupi loknu geta allir fengið Powerade og frítt í sund í einhverja af sundlaugum Reykjavíkur. Athugið þó að Grafarvogslaug er lokuð vegna viðgerða. Á meðal glæsilegra útdráttarverðlauna sem dregin verða út að hlaupi loknu eru tvö 50.000 kr gjafabréf frá Gaman Ferðum.

Kynntu þér Fjölnishlaup Gaman Ferða nánar hér.

fjolnishlaup1