Heim flag

Skráning hefst 11.janúar

Reykjavíkurmaraþon Íslandsbanka fer fram í 34.sinn laugardaginn 19.ágúst 2017. Þátttakendur geta valið á milli fimm vegalengda sem henta fyrir alla aldurshópa og fjölbreytt getustig:

Maraþon (42,2 km)
Hálft maraþon (21,1 km)
10 km hlaup
3 km skemmtiskokk
Krakkamaraþon (fyrir 9 ára og yngri)

Skráning í hlaupið hefst miðvikudaginn 11.janúar 2017 hér á marathon.is. Upplýsingar um verð og önnur praktísk atriði verða aðgengilegar hér á síðunni í lok desember.

Þau sem vilja gefa gjafabréf sem gildir sem greiðsla upp í þátttökugjöld í Reykjavíkurmaraþoni Íslandsbanka 2017 geta fundið nánari upplýsingar hér.

3km-2016

Jólagjöf sem hvetur til hreyfingar

Viltu gefa ávísun á skemmtilega upplifun og hvatningu til aukinnar hreyfingar? Þá er gjafabréf Íþróttabandalags Reykjavíkur sem gildir sem greiðsla í Reykjavíkurmaraþon Íslandsbanka og fjóra aðra íþróttaviðburði góð hugmynd.

Gjafabréfin gilda í fjögur ár og er hægt er að velja upphæð á bilinu 1.000-35.000 kr. Kaupandi fær gjafabréfið sent með tölvupósti innan fárra mínútna eftir að greiðsla berst og getur þá prentað það út og sett í jólapakkann.

Smelltu hér til að gjafabréf í viðburði á vegum Íþróttabandalags Reykjavíkur.

gjafabref-isl-small

Áheitametum fagnað

Uppskeruhátíð áheitasöfnunar Reykjavíkurmaraþons 2016 fór fram í gær. Aðalstyrktaraðili hlaupsins, Íslandsbanki, bauð til hátíðarinnar í útibúi sínu á Granda. Á uppskeruhátíðinni komu saman fulltrúar góðgerðafélaga, hlauparar, starfsmenn og stuðningsaðilar til að fagna góðum árangri áheitasöfnunar Reykjavíkurmaraþons Íslandsbanka sem fram fór á vefnum hlaupastyrkur.is. Í ár söfnuðu hlauparar 97.297.117 krónum til 164 góðgerðafélaga sem er nýtt met og 21% hærri upphæð en safnaðist í fyrra. Heildarupphæð áheita sem hafa safnast í tengslum við Reykjavíkurmaraþon Íslandsbanka frá því áheitasöfnun hófst árið 2006 er nú komin í rúmlega 545 milljónir.

Þeir hlauparar og boðhlaupslið sem söfnuðu mest fengu viðurkenningu á áheitahátíðinni í gær. Þá voru einnig veitt verðlaun til góðgerðafélaga sem voru með hvatningarstöð á hlaupaleiðinni, um var að ræða útdráttarverðlaun að upphæð 50 þúsund krónur sem komu í hlut MS félags Íslands og Parkinsonsamtakanna.

Skorri Rafn Rafnsson safnaði mest allra einstaklinga, 3.643.500 krónur fyrir Styrktarfélag krabbameinssjúkra barna. Aldrei áður hefur einstaklingur safnað eins miklu en gamla metið var 1,6 milljón frá árinu 2014. Hilmir Vilberg Arnarsson safnaði næst mest, 2.833.000 krónur fyrir CMT4A Styrktarsjóð Þórdísar. Í þriðja sæti einstaklinga var Lárus Guðmundur Jónsson sem safnaði 1.848.075 krónum fyrir Bergmál líknar- og vinafélag. Boðhlaupsliðið sem safnaði mestu var liðið Jötunn en þau söfnuðu 243.480 krónum fyrir Hjartaheill.

Alls bárust 26.988 einstök áheit í söfnun Reykjavíkurmaraþons Íslandsbanka á hlaupastyrkur.is í ár og var meðal upphæð áheita 3.605 krónur. Flest áheit fékk Valdimar Guðmundsson, 384 talsins, en hann safnaði 1.072.500 krónum fyrir Krabbameinsfélag Íslands. Aldrei áður hefur einstaklingur fengið eins mörg áheit og Valdimar fékk í ár, gamla metið var 341 áheit frá árinu 2014.

Áheitin voru greidd til góðgerðafélaganna um síðustu mánaðamót. Þau félög sem fengu mest úr söfnuninni í ár voru Styrktarfélag krabbameinssjúkra barna 6,7 milljónir, Ljósið 5,4 milljónir, og Krabbameinsfélag Íslands 4 milljónir. 118 af þeim 164 félögum sem safnað var fyrir fengu meira en 100.000 krónur í sinn hlut, 27 félög fengu meira en milljón.

Ingvar Sverrisson, formaður Íþróttabandalags Reykjavíkur sem sér um rekstur og framkvæmd Reykjavíkurmaraþons, stjórnaði stuttri dagskrá uppskeruhátíðarinnar. Til máls tóku einnig Birna Einarsdóttir, bankastjóri Íslandsbanka, og tónlistarmaðurinn Valdimar Guðmundsson sem var andlit auglýsingaherferðar hlaupsins í ár.

Smellið hér til að skoða lista yfir öll góðgerðafélögin sem upphæðir söfnuðust til og hér til að skoða helstu tölfræði söfnunarinnar á hlaupastyrkur.is.

Myndir frá uppskeruhátíðinni má finna á Facebooksíðu hlaupsins.

aheit2016-vidurkenningar

 

Uppskeruhátíð áheitasöfnunar 2016

Áheitasöfnun Reykjavíkurmaraþons Íslandsbanka á vefnum hlaupastyrkur.is gekk frábærlega í ár. Í heild söfnuðust rúmlega 97 milljónir sem er nýtt met í áheitasöfnun hlaupsins. Þessa dagana eru síðustu greiðslur að berast frá síma- og kortafyrirtækjum og því verða áheitin greidd inn á reikninga góðgerðafélaganna eftir helgi. Í áheitaskýrslu hlaupsins má sjá lista yfir upphæðirnar sem hvert félag fær greitt.

Miðvikudaginn 9.nóvember næstkomandi kl.17:30-18:30 verður haldin uppskeruhátíð áheitasöfnunar Reykjavíkurmaraþons Íslandsbanka 2016. Þar fá þeir einstaklingar sem söfnuðu mestu viðurkenningu og tvö góðgerðafélög sem voru dregin úr hópi þeirra félaga sem voru með hvatningarstöð í hlaupinu fá verðlaun. Það er Íslandsbanki, aðal samstarfsaðili hlaupsins, sem býður góðgerðafélögum, hlaupurum og skipuleggjendum hlaupsins í útibú sitt á Granda. Markmiðið með hátíðinni er að gefa þessum aðilum færi á að hittast og fagna saman góðum árangri söfnunarinnar á hlaupastyrkur.is. Boðið verður upp á léttar veitingar.

Stofnaður hefur verið viðburður á facebook þar sem allir sem ætla að mæta eru beðnir um að merkja við sig. Einnig er hægt að boða komu sína með því að senda póst á This email address is being protected from spambots. You need JavaScript enabled to view it. .

hlaupastyrkur 2016-loka

Takk fyrir daginn

33. Reykjavíkurmaraþon Íslandsbanka er nú lokið. Veðrið var frábært í Reykjavík í dag og sérstaklega skemmtilegt hversu margir komu út til að hvetja hlauparana.

Rúmlega 15 þúsund þátttakendur tóku þátt að þessu sinni. Hægt er að sjá úrslit hér og nokkrar myndir frá hlaupdeginum hér.

Áheitasöfnunin er ennþá í fullum gangi inni á hlaupastyrkur.is en lokað verður fyrir áheitasöfnunina á miðnætti á mánudaginn þann 22. ágúst. Nú þegar hafa safnast meira en 90 milljónir til góðra málefna.

Reykjavíkurmaraþon vill þakka þátttakendum, starfsfólki, samstarfsaðilum og áhorfendum fyrir frábæran dag.

harpa2016

Gleðilega hátíð

Í dag munu rúmlega 15 þúsund manns taka þátt í Reykjavíkurmaraþoni Íslandsbanka 2016 sem í ár fer fram í 33.sinn.

Við vonum að allir, bæði þátttakendur og áhorfendur, muni eiga góðan dag. Eftirfarandi eru slóðir á upplýsingar sem flestir eru að leita eftir á hlaupdag.

Dagskrá dagsins

Góðir hvatningarstaðir

Truflun á umferð

Lifandi úrslit

Kort af hlaupaleiðum

Samgöngur - menningarnott.is

Upplýsingamiðstöð hlaupsins er í Menntaskólanum í Reykjavík á hlaupdag og er opið frá kl.7. Þar geta hlauparar sem þurfa aðstoð með skráningarmál o.fl. fengið úrslausn sinna mála.

Skráning og afhending gagna fyrir þátttakendur í Krakkamaraþoni fer fram í tjaldi í suður enda Hljómskálagarðsins frá kl.12:00.

rm2014

 

Úrslitaþjónusta á hlaupdag

Í Reykjavíkurmaraþoni Íslandsbanka 2016 verður hægt að fylgjast með gengi hlaupara í tímatökuvegalengdunum í næstum því beinni útsendingu hér á marathon.is. Um er að ræða bráðabirgðaúrslit sem síðan munu birtast staðfest á marathon.is um kl.16. 

Einnig er hægt að fá skilaboð á Facebook vegginn sinn eða Twitter þegar valdir hlauparar koma í mark. Ef hlauparar vilja að vinir þeirra á samfélagsmiðlunum fái að vita þegar þeir koma í mark velja þeir sjálfan þig. Smelltu hér til að virkja þetta. Athugið að ekki eru allir skráðir þátttakendur á þessum lista því hægt var að haka við í skráningarferlinu ef fólk vildi ekki að væri að fylgjast með tímanum þeirra á samfélagsmiðlunum.

tvo-foss

 

Um Íþróttabandalag Reykjavíkur

Íþróttabandalag Reykjavíkur (ÍBR) var stofnað 1944 og eru samtök íþróttafélaganna í Reykjavík. Árlega hefur Íþróttabandalagið umsjón með sex stórum íþróttaviðburðum: Reykjavíkurmaraþon Íslandsbanka í ágúst, Laugavegshlaupið í júlí, WOW Tour of Reykjavik og Miðnæturhlaup Suzuki í júní, WOW Northern Lights Run í febrúar og WOW Reykjavik International Games í janúar.