Heim flag

Áheitamet á hlaupastyrkur.is

Áheitasöfnun Reykjavíkurmaraþons Íslandsbanka lauk á miðnætti í gær á hlaupastyrkur.is. Rúmlega 117 milljónir króna söfnuðust til 152 góðgerðarfélaga. Þetta er um 20% aukning frá því í fyrra þegar rúmlega 97 milljónir króna söfnuðust. Frá því áheitasöfnun Reykjavíkurmaraþons Íslandsbanka hófst árið 2006 hafa um 663 milljónir safnast til góðra málefna.

Góðgerðafélögin fá áheitin greidd til sín í lok október þegar allar greiðslur frá korta- og símafyrirtækjum hafa borist.

Skráðir þátttakendur í hlaupið í ár voru 14.390 og söfnuðu 4.649 þeirra áheitum á hlaupastyrkur.is. Erlendir hlauparar voru um 4000 talsins frá 87 löndum og tóku tæplega 260 þeirra þátt í söfnuninni.

Góðgerðafélögin senda hlaupurum og þeim sem hétu á hlaupara bestu þakkir fyrir stuðninginn.

hlaupastyrkur-isl-2017-8-22

Tilkynning frá Íþróttabandalagi Reykjavíkur

Í ljósi umræðu um Reykjavíkurmaraþon Íslandsbanka og vefinn hlaupastyrkur.is vill Íþróttabandalag Reykjavíkur koma eftirfarandi upplýsingum á framfæri:

Reykjavíkurmaraþon Íslandsbanka er einn stærsti íþróttaviðburður sem haldinn er á Íslandi á hverju ári. Laugardaginn 19.ágúst 2017 fór hlaupið fram í 34.sinn og tóku rúmlega fjórtán þúsund manns á öllum aldri þátt.

Reykjavíkurmaraþon Íslandsbanka er rekið af Íþróttabandalagi Reykjavíkur sem eru samtök íþróttafélaganna í Reykjavík. Þátttökugjöld fara í kostnað við að halda hlaupið sem að stærstum hluta er launakostnaður og kaup á ýmsum búnaði og aðföngum. Ef hagnaður verður af hlaupinu rennur hann til íþróttafélaganna í Reykjavík í gegnum sjóð sem þau geta sótt um styrki í. Fulltrúar íþróttafélaganna starfa einnig við hlaupið sem sjálfboðaliðar fyrir sín félög en maraþonið greiðir félögunum fyrir þeirra vinnuframlag. Með því að taka þátt í hlaupinu eru þátttakendur því líka að styrkja íþróttafélögin.

Söfnun til góðra málefna hefur verið hluti af Reykjavíkurmaraþoni Íslandsbanka í um 10 ára skeið. Alla tíð hefur verið tekið af söfnunarfé til að standa undir hluta af kostnaði sem Íþróttabandalag Reykjavíkur hefur við söfnunina, eins lítið og mögulegt er eða 5-7% hverju sinni. Í samkomulagi milli Íþróttabandalags Reykjavíkur og góðgerðafélaganna kemur fram að ÍBR hafi rétt til að taka allt að 10% í kostnað. Kostnaður við söfnunina er fólgin í vinnu við tölvukerfið sem hýsir söfnunina, vinnulaunum starfsfólks sem kemur að verkefninu og færslugjöldum greiðslukorta. Smellið hér til að finna yfirlit yfir hver kostnaðurinn við söfnunina hefur verið undanfarin 5 ár.

Áheitasöfnunin hefur farið fram á vefnum hlaupastyrkur.is síðan árið 2010. Á hverju ári skrá meira en 100 góðgerðafélög sig til þátttöku í söfnuninni og er þetta stærsta söfnun margra þeirra á hverju ári. Eftir því sem við komumst næst eru fáar safnanir og líklega engar af þessari stærðargráðu sem kosta félögin sem safna jafn lítið og áheitasöfnun Reykjavíkurmaraþons Íslandsbanka.

Reykjavíkurmaraþon Íslandsbanka á marga góða samstarfsaðila sem koma að hlaupinu með ýmsum hætti. Íslandsbanki er þeirra stærstur og er hans hlutverk í samstarfinu meðal annars að kynna viðburðinn innanlands. Einnig hefur bankinn komið með veglegum hætti að áheitasöfnunni t.d. gaf Íslandsbanki hlaupinu vefinn hlaupastyrkur.is árið 2010, hefur greitt hluta af kostnaði við uppfærslur á vefnum og alla markaðssetningu á honum. Það ber því að þakka Íslandsbanka fyrir þeirra mikilvæga framlag við þessa fjáröflun góðgerðarfélaganna og gera það mögulegt að halda kostnaði við söfnunina eins lágum og raun ber vitni. Við fögnum því að Íslandsbanki ætli að leggja söfnuninni enn frekar lið og greiða allan kostnað sem fellur til við söfnunina.

start-minni

Vel heppnað hlaup

Reykjavíkurmaraþon Íslandsbanka fór fram í 34.sinn í dag og gekk vel. Rúmlega 14 þúsund manns tóku þátt í fimm vegalengdum. Veðrið lék við hlaupara í dag sem voru fjölmargir að bæta sinn besta árangur.

Smelltu hér til að skoða heildarúrslit

Myndir af gleði dagsins eru komnar á Facebook og Instagram og munu fleiri bætast við á næstu dögum.

Áheitasöfnun Reykjavíkurmaraþons Íslandsbanka er enn í fullum gangi á hlaupastyrkur.is og sjálfsagt eiga einhverjir eftir að verðlauna sitt fólk fyrir góðan árangur í dag með viðbótar áheitum. Hægt verður að heita á hlaupara til miðnættis á mánudag 21.ágúst.

IMG 20170819 090510-minni

Hlaupdagur - helstu upplýsingar

Laugardaginn 19.ágúst munu um 14 þúsund manns taka þátt í Reykjavíkurmaraþoni Íslandsbanka 2017 sem í ár fer fram í 34.sinn.

Við vonum að allir, bæði þátttakendur og áhorfendur, muni eiga góðan dag. Eftirfarandi eru slóðir á upplýsingar sem flestir eru að leita eftir á hlaupdag.

Dagskrá dagsins

Góðir hvatningarstaðir

Truflun á umferð

Úrslitaþjónusta

Kort af hlaupaleiðum

Samgöngur - menningarnott.is

Upplýsingamiðstöð hlaupsins er í Menntaskólanum í Reykjavík á hlaupdag og er opið frá kl.7. Þar geta hlauparar sem þurfa aðstoð með skráningarmál o.fl. fengið úrslausn sinna mála.

Skráning og afhending gagna fyrir þátttakendur í Krakkamaraþoni fer fram í tjaldi í suður enda Hljómskálagarðsins frá kl.12:30.

rm2014

 

Hraðastjórar

Í Reykjavíkurmaraþoni Íslandsbanka 2017 býðst hlaupurum í 10 km, hálfmaraþoni og maraþoni aðstoð við að ná hraðamarkmiðum sínum. Hraðastjórar munu hlaupa áður nefndar vegalengdir á ákveðnum jöfnum hraða. Þeir verða í merktum vestum og með blöðrur til að hlauparar geti fylgt þeim. Hraðastjórarnir, sem eru allir vanir hlauparar, munu hlaupa á eftirtöldum tímum:

10 km hlaup

45 mínútur    Gísli Páll Reynisson
50 mínútur Margrét Elíasdóttir og Ragnheiður Sveinbjörnsdóttir
55 mínútur Ásta Laufey Aðalsteins og Hlín Hjartar Magnúsdóttir
60 mínútur Sif Jónsdóttir og Árni Gústafsson
65 mínútur Jóhanna Eiríksdóttir og Karl Gíslason
70 mínútur Pétur Valdimarsson og Tryggvi Haraldsson

Hálfmaraþon

1 klst og 45 mín    Snorri Gunnarsson og Þorsteinn Tryggvi Másson
1 klst og 50 mín Friðrik Ármann Guðmundsson og Svanhildur Þengilsdóttir
1 klst og 55 mín  Karl Arnar Aðalgeirsson og Sigríður Gísladóttir
2 klukkustundir Jóhanna Arnórsdóttir og Valur Þór Kristjánsson

Maraþon

4 klst    Dagur Egonsson og Ólafur Briem

Hvetjum þátttakendur til að kynna sér vel hraðahólfin við upphaf hlaupsins og skipulagið á marksvæðinu. 

 hradastjorar

Skráningarhátíð í Laugardalshöll

Forskráningu í Reykjavíkurmaraþon Íslandsbanka 2017 er nú lokið. Þau sem ekki náðu að forskrá sig geta skráð sig á skráningarhátíð í Laugardalshöll en þangað þurfa allir forskráðir þátttakendur líka að mæta til að ná í hlaupagögn sín.

Skráning og afhending gagna fer fram fimmtudag kl.15:00-20:00 og föstudag kl.14:00-19:00. Gengið er inn um inngang A sem er í nýjasta hluta Laugardalshallarinnar. 

Skráningarhátíðin er haldin samhliða stórsýningunni FIT & RUN 2017 sem er einstök sýning fyrir alla fjölskylduna þar sem áhersla er lögð á undirbúning hlaupara fyrir Reykjavíkurmaraþon Íslandsbanka, almenna hreyfingu, heilsufæði, fatnað, skóbúnað og aðrar stuðningsvörur hlauparans ásamt skemmtilegum uppákomum. Frítt er inná sýninguna og er hún öllum opin. Smellið hér til að finna upplýsingar um sýnendur og spennandi dagskrá.

Það er nóg af bílastæðum í Laugardalnum, t.d. við Laugardalsvöll og Skautahöllina í Laugardal, og hvetjum við alla til að leggja löglega.

laugardalsholl

Úrslitaþjónusta á hlaupdag

Í Reykjavíkurmaraþoni Íslandsbanka 2017 verður hægt að fylgjast með gengi hlaupara í tímatökuvegalengdunum í næstum því beinni útsendingu hér á marathon.is. Um er að ræða bráðabirgðaúrslit sem síðan munu birtast staðfest á marathon.is um kl.16. 

Einnig er hægt að fá skilaboð á Facebook vegginn sinn eða Twitter þegar valdir hlauparar koma í mark. Ef hlauparar vilja að vinir þeirra á samfélagsmiðlunum fái að vita þegar þeir koma í mark velja þeir sjálfan þig. Smelltu hér til að virkja þetta. Athugið að ekki eru allir skráðir þátttakendur á þessum lista því hægt var að haka við í skráningarferlinu ef fólk vildi ekki að væri að fylgjast með tímanum þeirra á samfélagsmiðlunum.

rm15-kirkja 

Um Reykjavíkurmaraþon

Reykjavíkurmaraþon var stofnað árið 1984.  Frá 2003 hefur Reykjavíkurmaraþon verið í umsjón Íþróttabandalags Reykjavíkur (ÍBR) sem eru samtök íþróttafélaganna í Reykjavík.  Á vegum Reykjavíkurmaraþons eru árlega haldin þrjú hlaup: Reykjavíkurmaraþon Íslandsbanka, Laugavegurinn - Ultra Maraþon og Miðnæturhlaup Suzuki. Reykjavíkurmaraþon fagnaði 30 ára afmæli árið 2013.