Um kl.19 í kvöld lauk 15. Laugavegshlaupinu en það hefur verið haldið árlega síðan 1997. Hlaupið sem er 55 km utanvegahlaup milli Landmannalauga og Þórsmerkur fór fram í dag í sól og blíðu. Als lögðu 306 hlauparar af stað úr Landmannalaugum í morgun og komu 289 hlauparar í mark í Þórsmörk. Þau sem ekki komu í mark þurftu ýmist að stoppa vegna meiðsla eða komu ekki á skráningarstaði innan tímamarka.

Fyrst í mark voru eins og áður hefur komið fram í fréttum þau Alexandre Vuistiner og Guðbjörg Margrét Björnsdóttir.

Veðrið á hlaupaleiðinni var eiginlega of gott því nokkrir hlauparar þurftu að fá aðhlynningu þegar þeir komu í mark útaf hitanum. Flestir voru þó vel á sig komnir að loknu hlaupi og nutu þess að borða góðan grillmat í góðviðrinu í Þórsmörk.

Smellið hér til að skoða úrslit hlaupsins og hér til að skoða myndir. Myndir af öllum hlaupurum að koma yfir marklínuna verða birtar á vefnum á mánudagskvöld.

Sigurvegari í kvennaflokki í Laugavegshlaupinu 2011 er Guðbjörg Margrét Björnsdóttir. Guðbjörg hljóp á tímanum 5:50:54 sem er þriggja mínútna bæting á hennar besta tíma og 13. besti tími kvenna frá upphafi. Þetta var sjötta Laugavegshlaupið sem Guðbjörg Margrét lýkur en hún hefur tekið þátt í hlaupinu árlega síðan 2005.

Í öðru sæti varð Ósk Vilhjálmsdóttir á 6:01:04. Ósk var að hlaupa sitt fyrsta Laugavegshlaup en á góðan tíma í maraþoni eða frá árinu 2009 eða 3:33 frá 2009.

Elísabet Margeirsdóttir varð í 3.sæti á 6:02:42. Elísabet bætti þar með sinn besta tíma í Laugavegshlaupinu frá árinu 2009 um 14 mínútur. Þetta var þriðja Laugavegshlaup Elísabetar.