Fimmtudaginn 18.febrúar kl. 17:00 eru góðgerðarfélög sem hafa áhuga á að taka þátt í áheitasöfnun í tengslum við Reykjavíkurmaraþon Íslandsbanka 2010 boðuð til kynningarfundar. Fundurinn fer fram í Íþróttamiðstöðinni í Laugardal, E sal á 2. hæð. Íþróttamiðstöðin er til húsa að Engjavegi 6, húsið sem er næst Laugardalshöllinni með inngang (aðalinngangur) fjærst Laugardalshöll.

Á kynningafundinum verður meðal annars farið yfir hvernig hægt er að skrá áheit, hvetja fólk til að heita á hlaupara, fylgjast með söfnun áheita o.fl. Allir fulltrúar góðgerðafélaga og samstarfsaðilar hlaupsins eru velkomnir og vonumst við til að sjá sem flesta sem hafa áhuga á að taka þátt í áheitasöfnun í tengslum við Reykjavíkurmaraþon Íslandsbanka sem fram fer laugardaginn 21.ágúst 2010.

Reykjavíkurmaraþon Íslandsbanka 2010 fer fram laugardaginn 21.ágúst næstkomandi. Skráning í hlaupið er hafin, smelltu hér til að skrá þig.

Líkt og undanfarin ár verður 3 km skemmtiskokk einn af vegalengdunum í Reykjavíkurmaraþoninu 2010 auk þess sem Latabæjarhlaupið fyrir yngstu kynslóðina verður á sínum stað. Boðið er upp fjórar keppnisgreinar í hlaupinu; maraþon (42,2 km), hálfmaraþon (21,1 km), 10 km hlaup og boðhlaup (42,2 km). Boðhlaupið er ný keppnisgrein í Reykjavíkurmaraþoni Íslandsbanka en hlaupið á maraþonbrautinni og því er vegalengdin 42,2 km eins og maraþonið. Tveir til fjórir skipta á milli sín hlaupaleiðinni og verða skiptistöðvar eftir 10 km, 20 km og 30 km. Ef fjórir hlaupa saman hlaupa þrír hlauparar 10 km og einn 12,2 km. Smelltu hér til að skoða nánari upplýsingar um boðhlaupið í Reykjavíkurmaraþoni Íslandsbanka 2010.

Þátttökugjaldið hækkar eftir því sem nær dregur hlaupi og því eru áhugasamir hvattir til að skrá sig sem fyrst. Smelltu hér til að skoða verðskrá fyrir Reykjavíkurmaraþon Íslandsbanka 2010.