Sjálfvirk tímataka er í 10 km, hálfu maraþoni, maraþoni og boðhlaupi. 

Tímatakan fer fram með tölvutækni, meðal annars litlum plastkubb sem kallaður er ”flaga” (á stærð við 10 kr pening) sem hver og einn þátttakandi fær afhenta með keppnisnúmeri.

Eins og áður verður notaður tímatökubúnaður frá ChampionChip. Hann samanstendur af mottum í rásmarki sem hlauparar fara yfir í byrjun og enda hlaups og flögu sem hver og einn hlaupari verður að festa við annan skóinn.

Án flögu fæst enginn tími og flagan virkar eingöngu sé hún fest á skó. Flagan geymir númer sem tengt er viðkomandi hlaupara og tímatakan hefst þegar farið er yfir motturnar í byrjun hlaups og lýkur þegar hlaupari kemst í mark.

Flögutími gefur því nákvæman persónulegan árangur hlaupara, óháð hve aftarlega í hópnum hann var við ræsingu. Einnig er tekinn tími frá því að startskot ríður af, sem kallast byssutími en það er sá tími sem gildir í keppninni og úrslit í einstökum flokkum eru ákvörðuð út frá. Þessi tækni gefur færi á að skrá millitíma hjá keppendum á völdum stöðum á leiðinni.

Flagan sem allir þátttakendur fá er einnota og gildir eingöngu í þetta ákveðna hlaup.  Þeir sem eiga eigin flögu og vilja nota hana geta það. Þeir geta haft samband við upplýsingaborð á skráningarhátíð föstudaginn 20. ágúst,  þar sem verður að endurskrá “eigin flögu” á keppenda.